Благој Веселинов се закити со награда на 69-тото издание на Берлинскиот филмски фестивал.
34-годишниот македонски актер ја доби статуетката „Shooting star“, која му беше врачена како еден од најдобрите европски актери во подем. Покрај него, оваа награда ја добија и уште девет актери од Србија, Естонија, Исланд, Норвешка, Германија, Данска, Полска, Шведска и Ирска.
Церемонијата се одржа во „Берлин палас“, а наградите им ги врачија членовите на жирито за оваа програма, македонската режисерка Теона Митевска и исландскиот актер Ингвар Сигурдсон.
Жирито било одушевено од глумата на Веселинов во филмот „Исцелител“. „Благој Веселинов целосно го импресионира жирито со неговата изведба во фимот ‘Исцелител’ на Ѓорче Ставрески, кој е проследен со длабока и неочекувана чувствителност. Со нетрпение очекуваме да видиме што ќе направи следно“ – стои во коментарот на членовите на жирито.
Пред Веселинов, од Македонија оваа награда ја имаат добиено и Лабина Митевска и Наташа Петровиќ.
