Очекувам да покажеме лидерство во сите институции и крајно време е Македонија да има фер и демократски избори и власта да ја вратиме кај граѓаните
Во Собранието започна расправата за избор на новите министри согласно договорот од Пржино. Во Владата ќе седнат истите министри и заменици-министри што седнаа за изборите што требаше да се одржат на 24 април.
Оливер Спасовски ќе биде нов министер за внатрешни работи, а Фросина Ременски за труд и социјала. Дополнителен заменик-министер за финансии ќе биде Кире Наумов, за информатичко општество и администрација Александар Кирацовски и дополнителен заменик-министер во Министерството за земјоделство е Љупчо Николовски.
Премиерот Емил Димитриев посочи дека за кус период се формира влада за спроведување на изборите и дека по двата неуспешни обиди очекува да бидат организирани фер и демократски избори. Тој очекува посветена работа од министрите и од замениците, што не беше случај минатиот пат.
– Очекувам да покажеме лидерство во сите институции и крајно време е Македонија да има фер и демократски избори и власта да ја вратиме кај граѓаните. И овие сто дена државата мора да функционира и мораме да бидеме посветени на економијата и на отворањето работни места – посочи премиерот.