Од неодамна започна снимањето на новата сезона на регионалното шоу „Твоето лице звучи познато“ ама овој пат продукцијата ги собра најдобрите учесници досега и затоа на името на шоуто е додадено „All stars“.
Меѓу сите тие ѕвезди кои досега маестрално се покажаа на сцената на ТЛЗП, секако е и победникот од 2016 година, нашиот Даниел Кајмакоски. Тој веќе е во Белград каде се снимаат новите епизоди, се обновуваат пријателствата и другарувањето зад и пред камерите.
Кајмакоски сосема ненаметливо се впушти во старо-нова авантура, а за неговото учество дознавме од српските медиуми кои пред околу една недела го објавија конечниот список на учесници, а потоа и за вистина.ком.мк, тој го потврди учеството и ги откри очекувањата.
„Предизвици секогаш ќе има и треба да ги има во животот, со нив растеме и се надминуваме себе си. Суштината беше тоа да се прифатат тие предизвици колку и да се тешки, затоа немам некоја посебна желба која имитација да ми се падне. Повеќе се препуштам на искусната екипа на “ТЛЗП“ бидејќи најинтересни се секогаш најтешките имитации“ ни изјави Кајмакоски.
Даниел сега е слободен човек со еден брак зад себе, така што максимално и се препупти на кариерата и се’ она што не го правеше откако кажа „да“ и стана татко.
Меѓу неговите последни фотографии се најде и таква каде е во друштво на атрактивната српска пејачка и поранешна учесничка во ТЛЗП, Едита Арадиновиќ, која се „залепила“ до нашиот Даниел, а во описот на „селфито“ вели дека има прекрасна енергија помеѓу нив.
Еден кадар не им беше доволен, па направија уште еден, само ги заменија страните. Убавата енергија меѓу нив е очигледна, а каква ќе биде онаа што ќе ја понудат пред камерите, останува да видиме…