Скоро 60 случаи на напад врз новинари регистрирало Министерството за внатрешни работи во периодот од 2013 до 2018 година. Од нив, 16 се уште се нерасчистени.
Според информациите од министерот за внатрешни работи Оливер Спасовски, најголемиот дел од нападите се регистрирани на подрачјето на СВР Скопје, а досега се поднесени 7 кривични и 8 прекршочни пријави за насилство или вербален напад кон новинари или медиумиски работници.
– Постапувано е во сите случаи и за две лица веќе се поднесени кривични пријави за сторени кривични дела насилство и загрозување на сигурноста, во три случаи се покренати прекршочни постапки против шест лица за констатирани три прекршоци, рече министерот Спасовски.
Најголемиот проблем, вели Спасовски, претставува тоа што во одредени предмети се пропуштени дејствија и постапки кои требало да бидат преземени за добивање на валидни резултати, а постојат и сомнежи дека во некои предмети недостасуваат докази, за што најави и санкции.