Златко Марин и СДСМ власта ја подразбираат за делење на криминални тендери и згрижување на своите најблиски во институциите.
Најновата информација до која дојдовме укажува на непотизам и искористување на роднински врски при поставување на директорски позиции, објавија од ВМРО-ДПМНЕ на социјалните мрежи.
Новопоставената директорка на градинката „Буба Мара“ во Аеродром, Елена Устамитова, е во тесна роднинска врска со Министерот за информатичко општество и администрација, како и потпретседател на СДСМ – Дамјан Манчевски, поточно негова братучедка, обвинуваат од општинскиот комитет на ВМРО-ДПМНЕ од Аеродром.
И покрај декларативните заложби на ресорниот министер за департизација на администрацијата, тој ја искористил својата положба и заедно со Златко Марин ја поставиле Устамитова за директор на градинка во Аеродром – велат од партискиот огранок на опозициската ВМРО-ДПМНЕ во општината.
Покрај роднинската врска со Дамјан Манчевски, Елена Устамитова е и сестра на Татјана Стојаноска Иванова, сопруга на новинарот Мишко Иванов, за која пред некој ден објавивме дека наплаќа дневници од по 10.000 денари од општина Аеродром.