Новиот европски ракометен првак, скопски Вардар, денеска беше на прием во Владата на Република Македонија. Управата и играчите беа пречекани од Зоран Заев, претседател на Владата, кој им посака добредојде.
Ви благодарам за среќата и радоста кои ни ги приредивте. Вие сте шампиони на нашите срца. Среќни сме што постои клубот и сакаме да опстане. Затоа, ќе предложам на седница на Влада да доделиме 500.000 евра како награда за постигнатиот успех, а дополнителни 100.000 евра ќе додели и Агенцијата за млади и спорт.
И веднаш, уште од денеска се посветуваме на мерките кои ќе ги преземеме за стабилност на клубот на исто ниво на кое е сега, но и за развој и успешна иднина понатаму.
Ќе се посветиме да изнајдеме начин за натамошната работа преку законски решенија и со помош на државните институции.
Вие им носите радост на граѓаните, а државата ќе возврати со влог во иднината на македонскиот ракомет и македонскиот спорт, рече Заев.
