Скалите во населбата Бирарија во општина Кисела Вода по вчерашните обилни врнежи на дожд се претворија во вистински скалести водопади, а општината ја доби својата атракција налик природното чудо, Плитвичките Езера.
Поради неажурноста на општинските служби и градоначалникот Филип Темелковски, во повеќе наврати граѓаните ни испраќаа слики од огромното количество на смет кое се наоѓа по улиците ширум општината. Контејнерите се преполни, а граѓаните немајќи каде да го фрлаат ѓубрето го фрлаат околу контејнерите.
Сите овие околности и нерасчистениот смет доведоа до запушување на атмосферската канализација која се преполни по обилните врнежи на дожд. Општината не навреме се справи и со запушената атмосферска канализација, по што во Кисела Вода се случи вистинска мини поплава.
