Продолжува слабата реализација на капиталните инвестиции. Изградбата на патишта, водоводи, градинки, училишта е во застој. Владата вети инвестициски бум, но до сега не потрошила ниту третина од предвиденото за оваа година – за пет месеци реализирани биле едвај 13 отсто од проектираните 420 милиони евра за капиталните проекти.
Со свечена церемонија надлежните денес ќе го пуштат во употреба автопатот Миладиновци – Штип, проект кој беше почнат и речиси целосно изграден од страна на претходната власт на ВМРО – ДПМНЕ. А, пред само еден месец, АМСМ официјално објави дека оваа автопатска деница е веќе во употреба и неа граѓаните секојдневно ја минуваат.
Закочена е и изградбата на една од клучните делници, автопатот Кичево – Охрид. Проблем е финансирањето. Владата се уште преговара со кинеската Ексим банка, а ако таа се откаже, ќе треба да се бараат други кредитори, процес што може да ја пролонгира изградбата.
На стенд бај е и последната делница од пругата кон Бугарија – Владата се уште нема најдено пари за продолжување на пругата од Крива Паланка до границата. Во фаза на тестирање е и пругата Битола – Кременица која неодамна беше завршена.
Земјава железнички не е поврзана ниту на запад. Планот за изградба на железницата од Кичево до Албанија е во почетна фаза, а поради огромните долгови на Македонски железници на може да мрднат планираните инвестиции – се правдаат надлежните.
Владата во новата транспортна стратегија до 2030 година го впиша и проектот, пруга од железничката станица во главниот град до скопскиот аеродром. Сепак, проектот остана само на хартија без конкретни рокови за реализација.