По оставката на Игор Дурловски од својата пратеничка функција како дел од коалицијата на ВМРО-ДПМНЕ, од опозициската партија објаснуваат дека тоа е личен став на пратеникот кој тие ќе го почитуваат.
„Тоа е личен став на Игор Дурловски кој ние го почитуваме. Како што кажува и самиот тој останува верен на Македонија, но и на Коалицијата за Обнова на Македонија и ВМРО-ДПМНЕ. Тој меѓудругото останува и стратешки соработник на претседателот на ВМРО-ДПМНЕ проф.др.Христијан Мицкоски“ – велат од партијата.
Доцна попладнево, Игор Дурловски, преку статус на социјалната мрежа ФБ објави дека ќе си поднесе оставка од пратеничката функција бидејќи политичката прагма е неподнослива и неморална.
„Националните интереси, правда за неправедно прогонетите и нормална држава за нашите деца беа/се мои приоритети. Пратеничката фотеља боде кога политичката прагма станува поважна од моралот. Затоа, го напуштам Собранието на Република Македонија, а на колегите од Коалицијата „За обнова на Македонија“ им посакувам истрајност, доследност, мудрост, којашто сум сигурен дека ја имаат.
Тоа што го зборував не можам да го направам, но сега нема да зборувам а ќе продолжам да го правам!
Останувам доследен на моите поддржувачи и нивниот глас.“ – напиша Дурловски на ФБ.