Во Шкотска, идентификувани се шест случаи на инфекција со новиот сој на ковид-19 наречен омикрон.
Шкотските власти соопштиле дека четири случаи биле пронајдени во Ланаркшир, еден во областа Голем Глазгов и еден во областа Клајд.
Експертите сега ги следат контактите на заразените за да утврдат каде точно се заразиле и со кого биле во контакт последните недели, пишува Би-Би-Си.
„Сите ќе добијат стручна помош и поддршка, а шкотското јавно здравство ќе ги следи контактите на заразените. Ова треба да ни помогне да го утврдиме потеклото на вирусот и да ги најдеме оние со кои заразените биле во контакт во последните недели“, вели министерот за здравство Хумза Јусаф.
Заменик министерот Џон Свини изјавил за Би-Би-Си дека „во некои случаи немало историја на патување“.
„Тоа ни кажува дека постои одреден степен на пренесување на овој вид на вирус во заедницата“, додаде тој.