Одлука за запирање на предметот за унапредување и именување на лица во АРМ, против поранешниот македонски претседател Ѓорге Иванов, денес донесе Државната комисија за спречување на корупција (ДКСК) во продолжението на 57-та седница.
Директорката на ДКСК, Билјана Ивановска, посочи дека постапката се затвора бидејќи Комисијата нема понатаму што повеќе да прави, со оглед надминатата и сменетата фактичка состојба.
– ДКСК во целост ја испочитува постапката и утврди фактичка состојба во која констатира постоење индиција – сомневање за прекршување на одредба Изборниот закон. Надлежните судски органи не ги земаа во предвид бројните појаснувања и дадени од ДКСК при утврдување на фактичката состојба. ДКСК оцени дека нема елементи за понатамошно постапување и заклучи дека предметот треба да се заклучи и архивира – изјави Ивановска, посочувајќи дека унапредувањата ги направил наредниот претседател на државата.
Ивановска потсети дека ДКСК постапувајќи по добиени сознанија од медиуми и пријави од непознати подносители, отворила предмет по сопствена иницијатива во врска со потпишани укази за унапредување и именување на лица во АРМ од страна на тогашниот претседател Иванов за време на изборниот период 2019 година.