Египет планира да изгради нов, „паметен“ град кој ќе биде новиот административен центар на државата и во него ќе живеат над 6,5 милиони жители.
Со него ќе се реши проблемот со зголемувањето на бројот на населението во земјата. Египет има дополнителни 2 милиона жители секоја година, според податоци од „Ројтерс“. До 2050 година населението на Египет треба да надмине 150 милиони, повеќе од 100 милиони жители што земјата ги има денес.
Каиро веќе е пренаселен, па затоа новиот град ќе ги удоми младите генерации. Се проценува дека изградбата на новиот главен град ќе чини од 45 милијарди долари до 58 милијарди долари, а ќе биде голем околу 700 квадратни километри.
Тој ќе се наоѓа на 35 километри источно од Каиро, а во него ќе се наоѓаат најголемиот аеродром во земјата, највисоката кула во Африка, најголемата опера на Блискиот Исток, голем урбан парк, ново собрание и претседателска палата. Владата планира да премести 34 министерства во новиот град следниот јуни.
Многумина го критикуваат проектот бидејќи владата троши милијарди долари за него додека граѓаните се соочуваат со инфлација и невработеност.