Двајца грчки и двајца српски владици, како и српски владини функционери три дена се рашетуваат низ македонските цркви и манастири во придружба на Вранишковски и неговите приврзаници. Биле и дел од црковната церемонија што нерегистрираната пара црква на Вранишковски ја организирала за 1100 годишнината од упокјувањето на Свети Климент Охридски во Нижеполе во Битола.
Денеска Вранишковски своите гости, меѓу нив и скандалозниот и контроверзен Врањски епископ Пахомије, обвинуван за злоставување малолетници во Србија, ги рашетувал низ црквите на МПЦ во Скопје и во Охрид. Покрај Пахомије, во Свети Наум во Охрид, на Пантелејмон во Скопје, како и во други цркви и манастири во Охрид биле и Тимочкиот епископ Иларион, како и Митрополитот на Китрус и Катерини Георгиј, Епископот Митрополитот Веријски, на Науса и Кампанија Пантелејмон, двајцата од редот на Грчката православна црква. Во нивна придружба бил и Милета Радојевиќ, директор на канцеларијата за односи со верските заедници на Србија.
Иако станува збор за цркви и манастири на Македонската православна црква, кои се имот на МПЦ, која Вранишковски и неговите приврзаници и медиумски пулени секојдневно ја омаловажуваат и понижуваат како комунистичка и расколничка творба, сепак тој слободно без никој да му пречи ги рашетува своите гости, претставувајќи се како домаќин на туѓото. Таков случај може да има само во Македонија.
Од друга страна пак тоа покажува дека МПЦ е далеку пред српските шовинистички владици во разбирањето на вредностите на Христијанството.
