Писмото од 1929 година во кое Винстон Черчил го нарече Долниот дом на британскиот парламент негова „сцена“, но исто така размислува и за напуштање на политиката, ќе се најде на аукција следната недела во Лондон.
Во писмото до неговиот пријател Фредерик Понсонби, идниот воен премиер напишал за ангажирање во „попријатни и профитабилни“ занимања отколку пратеник во парламентот, пренесува Ројтерс.
Месеци порано, во мај 1929 година, конзервативците ја загубија власта на изборите и биле заменети со малцинска влада на лабуристите, иако Черчил го задржал своето место како пратеник во Епинг.
„Черчил тогаш размислуваше за своите следни чекори“, рече шефот на одделот за книги и ракописи на аукциската куќа Бонам, Метју Хејли.
Хејли наведува дека во тоа време, Черчил отишол на турнеја низ Америка, на голем одмор со своето семејство и дека му пишувал на својот голем пријател.
Во тоа писмо, Черчил навел дека „Долниот дом отсекогаш бил негова сцена“.
Многу историчари ја сметаат декадата помеѓу 1929 и 1939 година како „диви години“ на Черчил, иако тој останал ангажиран за неколку прашања, вклучувајќи ја Индија и германската закана од Адолф Хитлер, пред да стане премиер во 1940 година.
Писмото ќе се најде на аукција во Бонам на 15 септември и се очекува да достигне цена помеѓу 4.000 и 6.000 фунти.
