Денес во поладневните часови две лица се изгубени во близина на Неолица (најблизок рид до Битола од планината Баба-Пелистер). Лицата телефонски пријавиле во СВР Битола дека се дезориентирани во просторот и залутале далеку од пешачката патека. СВР Битола го известува Центарот за управување со кризи, а од страна на РЦУК Битола известени се Горска служба од Битола и ДЗС Битола.
Тимови за потрага и спасување излегоа на терен, воспоставија телефонски контакт со изгубените лица и добија информации за нивно последно движење како претпоставена локација, но за жал батериите и на двата телефонски апарати беа комплетно испразнети, а последната комуникација на службите за потрага на терен со лицата беше околу 19:30 часот.
Без разлика на неможноста за контакт и комуникација со изгубените лица, службите останаа на терен во потрагата по изгубените лица.
Во 20,00 чaсот тимот на Горската служба за спасување, и тимот за спасување во планини на ДЗС ги пронајдоа изгубените лица. Истите се во добра здравствена состојба.