САД ќе испратат оружје и муниција во Украина оваа недела, односно последната серија воена помош планирана за годинава, изјави портпаролот на Пентагон Џон Кирби.
„Американскиот претседател Џозеф Бајден одобри пакет одбранбена помош од 60 милиони долари, а последниот дел ќе и биде доставен на Украина оваа недела“, рече Кирби.
Тој објасни дека вооружените сили на Украина ќе добијат оружје и муниција.
Да потсетиме, на 7 декември преку видео врска се одржа разговор меѓу Путин и Бајден, кој траеше околу два часа. Помошникот на рускиот лидер Јуриј Ушаков изјави дека рускиот претседател Владимир Путин разговарал со својот американски колега Џозеф Бајден за време на онлајн разговорите за црвените линии и заканите што ја засегаат Москва. Американскиот лидер, од своја страна, изрази загриженост поради влошувањето на ситуацијата околу Украина.