Во јавниот сообраќај во Скопје од денеска се вклучи автобус на струја, информираше Град Скопје. Во наредниве 6 месеци тој ќе вози нa линијата 15. Автобусот ќе биде дел од тест периодот на еко автобуси во градскиот сообраќај, по што Град Скопје и ЈСП Скопје ќе треба да одлучат со какви автобуси ќе го модернизираат возниот парк на јавното сообраќајно претпријатие. Станиците за полнење на автобусот, што ги постави ЕВН, се наоѓаат на крајната, односно почетната станица на 15 во Ново Лисиче и во Карпош 4 .
– Ова се одлични можности кои ќе не збогатат со нови искуства за градот, што понатаму ќе можеме да ги користиме во планирањето на модернизацијата на јавниот градски превоз. Вложувањето во јавен градски превоз којшто е енергетски ефикасен и што не го загадува воздухот е влог во создавањето здрава животна средина. Годинава предвидовме буџет за субвенции за набавка на екоавтобуси во висина од 100 милиони денари и за приватните превозници во висина од 20 милиони денари – изјави градоначалникот Петре Шилегов на промоцијата на автобусот.
Во Скопје веќе сообраќаат два екоавтобуси на гас, на линијата број 5 и на линијата број 2.
Автобусот кој денес го промовираше Шилегов сеуште не е царинет и е на бугарски таблички.