Градоначалникот на Кисела Вода, Орце Ѓорѓиевски, продолжува со решавање на проблемите во општината. Денес во заедничка акција со ЈП ,,Комунална хигиена” – Скопје беа исчистени 40 тони отпад од трите диви депонии на Теферич и пренесени на Дрисла.
„Загрижувачки е колку досега не се водело грижа за животната средина, која е основно и загарантирано право на секој граѓанин. Освен естетски, овој проблем има и друга поголема димензија која директно го засега и влијае врз здравјето на луѓето. Тоа мора да се промени и ние интензивно ќе бидеме посветени на чистењето на дивите депонии во општина Кисела Вода и одржувањето на здрава животна средина“, соопшти Ѓорѓиевски.
Тој потсети дека интензивно се работи и на чистење на депонијата во Дупки, а ќе продолжи и чистење и ремедијација на сите депонии во општината.
„Се надевам, дека на овој начин ќе ја оплемениме животната средина, но исто така се надевам и дека ќе ја подигнеме свеста кај граѓаните за потребата од соодветно положување на отпадот со цел заштита на средината во која живееме и нашето лично здравје.“, додаде Ѓорѓиевски.
Покрај чистењето на депониите, се работеше и во населба Драчево, каде што се расчистуваа паднатите лисја, се собираше комунален отпад и се миеја улиците, тротоарите и плочниците на потегот околу улицата „Коперникова“.
