Истражниот затвор во Шуто Оризари последниве денови е претворен во вистинска тврдина откако во него се сместени засилени полициски специјални сили.
Во дворот на затворот меѓу зградите каде што се сместени затвореници и административните згради се распоредени и борни оклопни полициски возила Хермелни а воведен е и посебен режим и поголема контрола на движењето во самиот затвор и при влез и излез од него.
Според вработени и затвореници во затворот од страна на полициските единици кои што ја преземале безбедноста на затворот од затворските чувари се врши и посебен мониторинг на улиците кои што гравитираат кон затворот особено влезот.
Неофицијално се работи за мерки преземени по добиени информации за реални закани за напад од страна на роднини и другари на уапсените во кумановското „Диво Насеље“ од Косово и од Македонија кои што во едно од сценаријата планирале да го нападнат затворот и да ги ослободат убијците на 8 полицајци во Куманово.
Колку се сериозни заканите говори и фактот што во обезбедување на уапсените од Куманово и во обезбедување на ИЗ Шутка се вклучени припадници на специјалната единица Тигар која што се смета за најподготвена полициска единица и која што учествуваше во борбите во Диво Насеље.
Речиси половина од затворените на кои што им се суди во Скопје се сместени во истражниот затвор во Шутка.
Дека состојбата е сериозна потврдуваат постојаните прелети над Скопје на полициските хеликоптери на секое рочиште за кумановските настани како и постојаните патроли на полициските специјалци кои што се распоредени на скопската заобиколница и особено на правецот Стенковец – Визбегово – Бит Пазар – Скопски Судови каде што на одредени делови полициски специјалци и припадници на редовната полиција се распоредени на буквално секои 50 метри и тоа со автомати во раце.