И покрај тоа што беше најавено на последната седница на Владата, не било разговарано за цена на струјата која АД ЕСМ ќе му ја понуди на универзалниот снабдувач, а ниту за тоа дали по 1 јануари ќе остане евтината тарифа. Засега остануваат само неофицијалните информации дека производната цена на струјата на АД ЕСМ, која е еден од главните критериуми за цената на домаќинствата од сегашните 36 евра, најверојатно ќе порасне на 45 евра за мегават-час, што е зголемување од околу 25 отсто. Така, на пример, ако сега сметката за струја им изнесува 4.000 денари за јануари ќе им биде 5.000 денари, односно 1.000 денари повеќе
Граѓаните сè уште се во неизвесност за тоа колку ќе им бидат повисоки сметките за струја по Нова година. И покрај тоа што беше најавено на последната седница на Владата не било разговарано за цена на струјата која АД ЕСМ ќе му ја понуди на универзалниот снабдувач, а ниту за тоа дали по 1 јануари ќе остане евтината тарифа. Засега остануваат само неофицијалните информации дека производната цена на струјата на АД ЕСМ, која е еден од главните критериуми за цената на домаќинствата од сегашните 36 евра, најверојатно ќе порасне на 45 евра за мегават-час, што е зголемување од околу 25 отсто. Така, на пример, ако сега сметката за струја им изнесува 4.000 денари, за јануари ќе им биде 5.000 денари, односно 1.000 денари повеќе. Сепак, извесно е дека поскапувањето на струјата и повисоките сметки уште повеќе ќе ги испразнат џебовите на граѓаните.
Освен цената проблем е и недостигот на струја, поради што Владата побара продолжување на енергетската криза во наредните шест месеци, односно до 9 јуни 2022 година. Освен за домаќинствата струја нема и за компаниите кои пред неколку дена предупредија дека ситуацијата е алармантна и оти мора во функција да се стават сите производствени капацитети и да се зголеми домашното производство.
По повеќегодишна пауза, со работа почна и РЕК „Осломеј“, а се очекува наскоро да почне со работа и ТЕЦ „Неготино“. Досега за РЕК „Осломеј“ се набавени 130.000 тони јаглен, а до крајот на следната година предвидено е да се транспортираат уште 170.000 тони. „Осломеј“ има капацитет од 110 мегавати и последните години не работеше поради недостиг на јаглен.
Во РЕК „Битола“ се работи и на санација на третиот блок, кој според информации од државната ЕСМ, би требало да почне со работа следната година. Во моментов во комбинатот работат двата блока, а за овој комбинат се обезбедени 90 илјади тони јаглен.
Но сепак, експертите коментираат дека пуштањето во употреба на РЕК „Осломеј“ и на ТЕЦ Неготино не значи дека е решен проблемот со недостаток на струја. Кризата сè уште постои, а со нивно повторно проработување само ќе се ублажи ударот во енергетскиот сектор.
-Вкупниот капацитет на ТЕЦ Неготино е 21 мегавати кој не е доволен за да се задоволат вкупните потреби на домаќинствата и на малите потрошувачи кои се над 60 отсто. Ако сите енергетски капацитети работата 24 часа, без поткрепа од хидрелектраните нема да може да се задоволат вкупните потреби на државата, изјави за ВЕЧЕР Константин Димитров, универзитетски професор и енергетски експерт.
Поскапувањето на струјата ќе биде неизбежно, а според експертите тоа може да стигне и до 50 отсто со цел да не се создаде преголема финансиска загуба во енергетскиот систем.
-Ние и претходно најавивме дека енергетската криза не може да се реши за еден месец и оти ќе трае до крајот на мај кога се очекува цената на струјата на берзите да се стабилизира. Според најавите од Владата и од ЕСМ, цената на струјата ќе биде повисока за 25 отсто, а реално треба да биде повисока за 50 отсто за да нема загуби во енергетскиот систем. Тоа значи дека сметките на граѓаните ќе бидат повисоки исто така за 25 отсто, така на пример ако сега плаќаат 4.000 денари за струја по Нова Година ќе плаќаат 5.000 денари, односно 1.000 денари повеќе, вели за ВЕЧЕР, Ѓорѓи Манасков, енергетски експерт.
На енергетските компаниите досега им беа дадени 65 милиони евра за покривање на трошоците кои ги имаа изминатиов период. Надлежните најавија дека ако е потребно, ќе има и дополнителна финансиска помош.
