Премиерот во заминување и лидер на партијата ГЕРБ, која освои најмногу гласови на неделните парламентарни избори во Бугарија, Бојко Борисов, денеска го повика Слави Трифонов од партијата „Има таков народ“ да ја преземе политичката одговорност во земјата, јави дописникот на МИА од Софија.
Борисов соопшти дека ГЕРБ ќе предложи влада, во согласност со бугарскиот Устав, како прва политичка сила во земјата, предвидувајќи дека нема да биде избран, по што мандатот ќе го добие партијата на Трифонов „Има таков народ“.
Премиерот кажа дека најколегијално побарал од Трифонов да почне со формирање влада.
Со цел Бугарија да има политичка и економска стабилност ГЕРБ е подготвен да даде 10 пратеници за поддршка на владата на Слави Трифонов во новиот бугарски Парламент – рече Борисов за време на редовната седница на бугарската Влада.
Борисов прокоментира дека нови избори не се решение за земјата и додаде дека парламентот може да одржи седница на која треба да се донесе одлука за свикување на Големото национално собрание, на која претседателот Румен Радев ќе го достави својот предлог за нов Устав на Бугарија.
Тој, исто така, коментираше дека за само неколку месеци луѓето во Бугарија ќе донесат свои заклучоци за тоа кој е подобар за нив.
Основачот на партијата “Има такви луѓе”, пејачот и шоумен Слави Трифонов која стана втора бугарска политичка сила има многу поцврсти ставови за Македонците од неговиот колега Красимир Каракачанов кој е симбол на бугарското антимакедонство.
За Трифонов нема дилема што се Македонците.
“Постои „таканаречена“ земја, наречена Македонија, а оние што живеат во неа се збунети луѓе. И тие не знаат точно што се. Јас ќе ти кажам кои се тие. Од она што го прават, вклучувајќи го и овој референдум, повеќе од јасно е што се тие. Тие се Бугари”, напишал Трифонов пред да стане трета најважна фигура во бугарската политика.