Финалето на Ролан Гарос меѓу Новак Ѓоковиќ и Рафаел Надал ќе биде судир на двајцата најдобри тенисери на денешницата.
Тоа ќе биде 56-ти дуел на двете тениски легенди, а засега предноста е на страна на српскиот играч (29-26). Овој меч ќе биде од исклучително значење и за двајцата финалисти. Неколку рекорди ќе се срушат кој и да победи, а Србинот пред себе има историска можност да стане единствен во една категорија.
Досега ниту еден тенисер пред него не победил двапати на секој Грен слем турнир. Роџер Федерер како и Ѓоковиќ има една победа во Париз, а Надал само еднаш се израдувал на Австралија опен.
Првиот светски рекет знае како е да се победи Надал на централниот терен „Филип Шатрие“. Во 2015 година запиша победа над големиот фаворит и ривал со убедливи 3-0 во четвртфиналната фаза. Тој период беше еден од најдобрите во неговата кариера, кој сепак не му донесе славје во француската престолнина таа сезона.
Фаворитската улога и во ова финале ќе биде на страна на „кралот на земја“, но ако се земе предвид формата на српскиот ас и фактот дека никој не го надиграл во 2020 година, тогаш може да се очекува епски судир на двата тениски шампиони.
