Судот синоќа го прифати барањето на опозициското движење Самоопределување за прогласување за неважечки на еден од гласовите на пратениците за избор на владата на Хоти.
Според судската одлука, вонредни парламентарни избори треба да се одржат во рок од 40 дена од нивното прогласување од страна на претседателот на републиката, а во конкретната ситуација тоа треба да го стори вршителката на должноста на таа функција, Вјоса Османи.
Причина за спорење на легитимитетот на пратеникот од партиите на немнозинските етнички заедници, е тоа што пред да биде избран за член на законодавниот дом на Косово бил правосилно осуден на 15 месеци затвор заради кривично дело злоупотреба на службената должност.
Владата на Авдулах Хоти беше избрана на 3 јуни годинава, откако претходно беше изгласана недоверба на владата на Албин Курти, кој ја водеше земјата во претходните четири месеци.