Платформата за резервации преку Интернет, Booking.com е осомничена за наводно затајување данок во вредност од над 153 милиони евра, објави во четвртокот италијанската финансиска полиција во Џенова, пренесува Еуроактив
Според истрагата, која започна во 2018 година, компанијата издавала фактури без ДДВ, применувајќи го таканаречениот механизам „обратна наплата“ дури и во случаи кога сместувачкиот објект бил без ДДВ-број. Ова резултираше со тоа што ДДВ не беше деклариран или платен во Италија.
Преку овој механизам, Букинг наводно заработил околу 700 милиони евра на скоро 900.000 трансакции, за кои не платил ДДВ од 153 милиони евра.
Компанијата немаше даночен претставник во Италија и затоа, наводно, не ги пријавила приходите на даночните власти таму, со што се постигнало целосно затајување данок, што не било платено ниту во Италија, ниту во Холандија, велат извори од финансиската полиција.
„Во согласност со европското законодавство за ДДВ, ние веруваме дека сите наши партнерски структури во Европската унија, вклучувајќи ги и италијанските, се одговорни за проценка на плаќањето на локалниот ДДВ и плаќањето на соодветните влади“, напишал Букинг во белешката.
„Потврдуваме дека го добивме неодамнешниот извештај за проценка од италијанските власти, кој сега ќе го испита Агенцијата за приходи и кој имаме намера да го испитаме во целосна соработка со последната“, додаде холандската компанија.
Ова може да стане еден од првите случаи на затајување данок на новосоздаденото Европско јавно обвинителство (ЕППО), кое веќе контактирало со своите италијански колеги за да види како треба да се постапи.
