Ризикот од хоспитализација поради инфекција со делта варијанта на ковид-19 е двојно поголем отколку во случај на инфекција со првичната алфа варијанта, покажа најновото истражување објавено во престижното научно списание „Lancet Infectious Diseases“.
Истражувачите откриле дека ризикот од хоспитализација е во просек 2,26 пати поголем ако заразата е со делта варијантата на вирусот.
Научниците од Универзитетот во Кембриџ и Агенцијата за јавно здравје на Англија анализираа повеќе од 40.000 случаи на ковид-19 во Англија од крајот на март до крајот на мај 2021 година.
Резултатите објавени денеска главно се однесуваат на невакцинираните, а за целосно вакцинирани, не може да се извлечат заклучоци од анализираните податоци.
Досега, студиите генерално покажаа дека делтата е повеќе заразна, но нема сигурни податоци за ризикот од тешка форма на болеста од ковид-19.
Од 40.000 случаи во студијата, само 1,8 проценти биле целосно вакцинирани, што истражувачите го толкуваат како потврда за високата ефикасност на вакцината.