Уште еден македонски клуб е „жртва“ на коронавирусот. Незгодниот вирус, кој долго време прави сериозни проблеми во македонскиот ракомет, не го одмина и Металург.
По цела низа тестирања во кои секогаш резултатите беа негативни, денешното тестирање покажа дека вирусот тропна и на вратата на клубот од Автокоманда.
„РК Металург до денес успеваше да се заштити од Ковид 19 и искрено бев среќна поради тоа. Сведоци сме дека последните денови вирусот нападна преголем дел од населението, како и ракометните клубови. Исклучок не е ни Металург. Од последното тестирање во минатата недела до денешното, за жал имаме два позитивни случаи, од кои еден е играч, а еден е член на стручниот штаб. И двајцата се без симптоми и се во добра здравствена состојба. Ќе ги испочитуваат протоколите и ќе останат во изолација до следното тестирање за 10 дена. Им посакувам брзо оздравување. Сите други се тестирани и се негативни. Најодговорно тврдам дека сите мерки за заштита беа запазени, а играчите, стручниот штаб, како и управата максимално се придржуваа на препораките“, изјави претседателката на Металург Зорица Блажевска.
Металург в понеделник ќе замине во Франција, каде во вторник ќе го одигра првиот натпревар во групната фаза против екипата на Тулуз.