Во време кога повеќето производители или ги укинуваат или ги електрифицираат лутите верзии на своите модели, во Toyota се одлучија за сосема поинаков потег. Тоа можеби зачудува бидејќи Toyota е лидер во зелените технологии а од друга страна протежира изведба со потентен бензински мотор. Yaris GR под поклопецот на моторот крие 1,6 литарски трицилиндричен турбо агрегат со дури 261 KS и 360 Nm. За формулата за забава да биде комплетна, силата се пренесува на сите четири тркала со мануелен менувач. Плус на тоа, овој модел може да се нарача и со опционален Circuit пакет кој содржи блокирање на диференцијалите, дополнително подобрено ослонување и 18-инчни тркала со Michelin Pilot Sport 4S пневматици..
Возачот на располагање има три различни режими на возење – Normal, Sport и Track, кои во зависност од изборот го распределуваат вртежниот момент меѓу оските во сооднос 60:40, 30:70 или 50:50. Кога ќе земеме предвид дека автомобилот е тежок 1.280 kg, јасно е дека станува збор за ѓаволски забавен тркач кој до стотка ќе стигне за 5,5 секунди и нема да застане до електронски лимитираните 230 km/h.
Визуелно овој модел се истакнува со масивни спојлери и крила, дискретен спојлер назад, прилично впечатлив дифузор и двојни издувни цевки. Внатрешноста изобилува со алкантара, а GR ознаките даваат до знаење дека не е обичен автомобил. Тука се и неизоставните спортски седишта кои се грижат возачот да остане во иста положба при секакво возење.
Е сега доаѓаме до неизбежниот дел, цената! Перформансните автомобили секогаш биле над хоризонтот на обичните купувачи, особено некој што на четири метри должина тежи 1,3 тона сосе погонот на сите тркала и моторот од 261 КС. Проценката е дека иако со висока цена од 37.690 евра Yaris GR ќе биде дочекан со отворени раце.
