Турско семејство кое се враќаше во Европа од одмор од татковината, ја заборави својата 14-годишна ќерка на бензинската пумпа.
Исчезнувањето на детето го забележале дури во Лапово, па ја алармирале локалната полиција, која ги известила нивните колеги од Ниш, па девојчето било згрижено додека не се вратат нејзините родители. Според медиумите, необичниот настан се случил на 7 август на бензинската пумпа на делот од автопатот Белград-Ниш.
„Девојчето и нејзиниот брат спиеја на задното седиште од автомобилот кога нивните родители го напуштија возилото. За време на нивното отсуство, 14-годишната девојка исто така излезе од автомобилот, но помина покрај нејзиниот татко и мајка, кои влегоа во автомобилот и го продолжија патувањето, а забележаа дека детето не е таму дури кај Лапово, кога момчето се разбуди и им кажа дека исчезнала неговата сестра“, велат соговорниците запознаени со случајот.
Турски државјани отишле во Полициската станица Лапово и побарале помош, по што била предупредена нишката полиција, пишуваат белградските медиуми и пренесува Танјуг.
Според извори на Телеграф, полицајци од полициската управа во Ниш веднаш отишле до бензинската пумпа и нашле тинејџерка како седи на клупа. Со себе имала патна исправа, па се потврдило дека станува збор за девојка која ја бараат нејзините родители.
Полицајците останале со девојчето додека нејзините родители не ја презеле и го продолжиле патувањето.
Полициската управа потврди дека нивните службеници се грижеле за малолетно девојче пронајдено на бензинска пумпа во близина на Ниш додека не пристигнале нејзините родители.
