Во финалниот натпревар кој се одигра денеска на спортското игралиште во населбата Влае, учениците од ООУ „Владо Тасевски” ги совладаа своите ривали од ООУ „Аврам Писевски” и го освоија училишниот фудбалски Куп, кој по четврти пат го организира Општина Карпош, по повод роденденот на локалната самоуправа 3. ноември.
Фудбалерите од Козле беа убедливи против бардовчани и веќе по првото полувреме обезбедија солидна предност од 4:1. Во тимот на „Владо Тасевски”, одлично функционираше нападот и средниот ред, а во второто полувреме нивната одбрана беше само еднаш „матирана” и во продолжение успеаја натпреварот рутински да го доведат до крај, со конечен резултат од 4:2.
На денешното финале присуствуваше и градоначалникот на Општина Карпош, Стефан Богоев, кој во оваа пригода на основците им ги врачи дипломите за учество и победничкиот пехар на овогодинешните освојувачи на Купот.