Ракометната Федерација на Македонија, обелодени дека спогодбено го раскинала договорот со селекторот на македонската ракометна репрезентација, Раул Гонзалез. По завршувањето на Светското првенство во Германија и Данска, на кој Македонија заврши на 15. позиција, РФМ и Раул имаа разговори и одлучиле дека е потребна промена.
Од РФМ велат дека машката А-селекција има потреба да има стратег кој секојдневно ќе биде посветен и во тек со сите збуднувања поврзани со репрезентацијата. Воедно, проблем во соработката претставувала и оддалеченоста и професионалните клубски обврски на досегашниот селектор.
-Земајќи ја предвид потребата машката А-селекција да има стратег кој секојдневно ќе биде посветен и во тек со сите збуднувања поврзани со репрезентацијата, како и оддалеченоста и професионалните клубски обврски на досегашниот селектор, обете страни пријателски и фер се сложија околу прекинувањето на соработката.
Би сакале да му се заблагодариме на “Ел команданте” за досегашното работење со нашиот А-тим и му посакуваме се најдобро, многу успеси и многу титули во иднина. Иако ќе ни недостасува неговата смиреност и тактичност на клупата, продолжуваме секој со своите предизвици кон нови победи, се вели во сопштението на РФМ.
Раул Гонзалез на тренерското столче пристигна на местото на Лино Червар и ја водеше Македонија на две големи натпреварувања, на Европското првенство во 2018 и Светското првенство во 2019 година.