За време на партискиот собир на Самоопределување, во јужниот дел на Косовска Митровица, едно лице физички и со навреди го нападна лидерот на тоа движење и поранешниот косовски премиер, Албин Курти, пренесуваат Репортери.
Еден од присутните на партискиот собир во Митровица жестоко го навредил водачот на Самоопределување и се обидел физички да се пресмета со него, што било спречено од обезбедувањето, пишува приштинскиот весник.
Реагираше и градоначалникот на Јужна Митровица, Агим Бахтири, кој се обиде физички да се пресмета со тој граѓанин, пренесува Косово онлајн.
Заминувањето на Вјоса Османи и Албин Курти на северот на Косово предизвика бројни проблеми и несогласувања. Во текот на денешниот ден, претставниците на Демократската партија на Косово (ДПК) реагираа со изјава во која сметаат дека лидерот на движењето Самоопределување, Албин Курти и в.д. претседателот на државата, Вјоса Османи, го посрамотиле уставниот поредок и Косово со тоа што отишле во Северна Митровица да собираат ефтини политички поени.
Повеќе од една деценија, Албин Курти зборуваше за „одење во Митровица“, и тие негови постапки се управувани од омраза да докаже дека државата Косово е неспособна и пропадната. Тој се обидува да профитира политички на штета на институциите, а денес ја посрамоти државата и сериозно влијаеше на достигнувањата во тој дел на Косово, се наведува во соопштението на ДПК, кое го пренесе приштинскиот весник Газета експрес.