Ова се турбулентни времиња. Светот станува покомпетитивен, нестабилен и непредвидлив. Сајбернападите стануваат почести, софистицирани и дисруптивни, терористичките закани опстојуваат, нуклеарните оружја се распространети, а промените на климата создаваат нестабилност и кризи, напиша генералниот секретар на НАТО Јенс Столтенберг во неговиот авторски текст за „Дифенс њуз“.
Овие предизвици влијаат врз нашата безбедност на двете страни на Атлантикот. Тие се различни, но има само еден начин за Северна Америка и Европа да се справат со нив – да го сторат тоа заедно, во НАТО.
Со американскиот претседател Џо Бајден и неговата администрација, како и со законодавците на двете страни, остануваме цврсто посветени на трансатлантската врска, и со зголемена соработка со Европа, ние имаме единствена можност и јасна обврска да ја направиме нашата силна Алијанса, уште посилна.
На самитот на НАТО во јуни, лидерите ја прифатија нашата смела агенда НАТО 2030 за следната деценија и понатаму, за засилување на Алијансата во светот со предизвици.
Одлучивме да го искористиме НАТО уште повеќе на клучниот форум за безбедносните консултации и за одлуките меѓу нашите 30 нации. Ние ја засилуваме нашата отпорност и одбрана низ сите сфери – копно, вода, воздух, вселена и сајберпростор. Продолжуваме да се бориме против тероризмот и да работиме заедно со меѓународната заедница за да придонесеме за стабилност на нашите граници, вклучително и преку извлекување на важни лекции од минатите мисии.