Скопје и скопјани ќе имаат можност повторно да бидат дел од едно уникатно културно доживување, на веќе традиционалната „Бела ноќ“.
Многубројните уметници што ќе им се претстават на граѓаните со концерти, изложби, кинопроекции и други културни перформанси на 13 локации ќе го претворат Скопје во центар на културните случувања во државата.
Поради состојбата со пандемијата на ковид-19, „Бела ноќ“ и годинава, како и минатата година, се одржува една недела порано од предвиденото.
Официјалната програма на „Бела ноќ“ ќе започне утре, 25 септември, во 19:00 часот и ќе трае до полноќ, а поради состојбата со коронавирусот, работното време на локалите ќе остане исто, односно нема да работат во текот на целата ноќ.
Сите настани ќе се одвиваат според протоколите предвидени од Министерството за здравство, на сите локации ќе биде поставена редарска служба и при влез во локацијата посетителите ќе треба да покажат потврда за вакцинација.
Повеќе детали за програмата може да најдете на следниот линк: https://www.belanok.com/home
