Двајца членови на руската мотоциклистичка група „Ноќни волци“ биле спречени да влезат во Босна и Херцеговина. Според тамошните медиуми, станува збор за водачот на групата, Александар Залдостанов, и за Саша Савиќ, член на групата со српско потекло. Причина за забраната, како што наведуваат медиумите, е процената дека тие претставуваат опасност за сигурноста.
Руската мотоциклистичка група „Ноќни волци“, која е позната по приврзаноста кон рускиот национализам и кон рускиот претседател Владимир Путин, најави турнеја по Босна и Србија, наречена „Руски Балкан“. Дваесетина члена на групата, која е под санкции за поддршката на сепаратистичката војна во Украина, патуваат низ Балканот за, како што е соопштено на веб-страницата на „Ноќните волци“, да го истражат руското културно влијание на Балканот.
