Работев добро со Џорџ В.Буш, Барак Обама и Доналд Трамп, но не можам да кажам дека започнавме добро со Џо Бајден, изјави турскиот претседател Реџеп Таип Ердоган во соопштение, изразувајќи незадоволство од актуелниот американски претседател.
„По 19 години на функцијата, не можам да кажам дека постигнавме добра позиција со САД. Тие треба да разберат дека Турција нема да отстапи од договорот за С-400″, вели Ердоган, осврнувајќи се на рускиот систем за противракетна одбрана, што доведе до конфликт меѓу Турција и САД.
Запрашан за односот на Турција кон неодамнешните настани во Авганистан, Ердоган го истакна „неуспехот и рамнодушноста на САД кон ситуацијата”.
Тој нагласи дека САД ја донеле својата одлука без да се консултираат со Турција и затоа не можат да очекуваат дека Турција ќе ја плати цената „за нивното неодговорно однесување”.
„Незамисливо е Турција да ги отвори вратите и да ги прифати (авганистанските мигранти). Нашата земја не е отворена територија. Не е лесно да се прифати такво нешто. Оваа акција има цена. САД не можат да ни кажат: ‘отворете ги вратите и пуштете го авганистанскиот народ да влезе во Турција’. Тука САД мора да ја платат цената. САД мора да преземат чекори во овој поглед”, додаде турскиот претседател.
