Генералниот секретар на ВМРО-ДПМНЕ, Христијан Мицкоски во денешната дебата на Канал 5 телевизија, на генералниот секретар на СДСМ, Александар Кирацовски му порача СДСМ да не се занимава со ВМРО-ДПМНЕ бидејќи им бегаат нивните поддржувачи.
-ВМРО-ДПМНЕ си се занимава со самиот себе и знае што треба да направи и тоа го потврди 10 изборни циклуси наназад и тоа ќе го запечати на 11 – на 15 октомври. Оставете го ВМРО-ДПМНЕ. Сепак, на каков таков начин, еве и самите рековте ќе го бетонирате легитимитетот што досега го немате, обидете се на граѓаните да им ги решите егзистенцијалните проблеми. Вие сте Влада во моментот, не е ВМРО-ДПМНЕ. Губите ваши поддржувачи, колега Кирацовски, истакна Мицкоски.
Тој потенцираше дека ВМРО-ДПМНЕ е присутна меѓу граѓаните.
-Допираме до секој еден граѓанин на Република Македонија без разлика не неговата етничка и политичка припадност. Тоа ни дава нас само поголем мотив да истраеме во оваа битка и истата да ја завршиме со огромен триумф на 15 октомври, посочи Мицковски.
