Рускиот претседател Владимир Путин вчера свикал состанок на членовите на Советот за безбедност за руско-американските односи, еден ден пред денешниот телефонски разговор со американскиот претседател Доналд Трамп.
Портпаролот на Кремљ, Дмитриј Песков, изјави дека двајцата претседатели ќе разменат мислења „за основните параметри на постојните билатерални односи“.
Песков изјави дека Владимир Путин и Доналд Трамп последен пат зборувале кога рускиот претседател му честитал на републиканецот по победата на претседателските избори.
Тој одби да прецизира за што точно ќе разговараат двајцата претседатели, но рече дека ќе ја искористат приликата за да договорат средба.
Советничката на Трамп Келиен Конвеј за телевизијата Фокс њуз изјави дека Путин и Трамп ќе разговараат за санкциите на САД кон Русија и за други теми.
Таа наведе дека претседателот на САД ќе биде спремен да прифати нови идеи ако рускиот лидер сака сериозна комуникација за борбата против Исламска држава.
Претседателот Доналд Трамп денеска ќе разговара со лидерите на Русија, Франција и Германија, соопшти Белата куќа.
Портпаролот на Белата куќа, Шон Спајсер, на Твитер напиша дека Трамп освен со рускиот претседател Владимир Путин, денеска ќе разговара и со францускиот претседател Франсоа Оланд и со германската канцеларка Ангела Меркел.
