Премногу гужва, доцнења, запрен сообраќај, „шверцување‟, вербални и физички напади од возачите, се само некои од клучните зборови меѓу граѓаните што го користат јавниот превоз во Куманово.
Веќе и возењето во кумановските автобуси многу кажува за состојбата во јавниот превоз во еден од најголемите градови во Македонија. Возилата се во тешка состојба, во кои греењето често работи во лето наместо во зима, вратите не се затвараат најдобро, па е многу опасно да се биде во нивна близина. Седиштата подобро да се избегнуваат, бидејќи ретко се чистат, се подглавуваат, се крпат…
Изјавите на патниците воопшто не се пријатни за слушање, а јасно е дека изјавите од страна на возачите се во целосна спротивност. Патниците се жалат на секојдневни вербални напади, пцовки, па и обиди за физичко насилство. Сепак јасно дека само погледот на автобусите на кумановските улици зборува многу за состојбата во јавниот превоз.Најсмешна е сликата од кумановските улици во која патниците буткаат минибус. Но, кумановчаните и понатаму се возат во истите тие возила, одат на работа, пазар или таму каде што мораат и со завист гледаат во содениот град Скопје.
Известувања на станиците, детална карта на мрежата на јавниот превоз и информациите кои треба да се добијат во самото возило, едноставно ги нема! Ако не го познава доволно градот, патникот намерник останува да го прашува првиот до себе: „Се извинувам, а каде треба да се симнам…‟.
Јавниот градски превоз во градот, каде пукнала првата пушка, иако со мал стаж на постоење и превезување на граѓаните, јасно им е на сите дека одамна мора да излезат од 20 век и да бидат во чекор со колегите од Балканот. Поради тоа потребно е рационалност во работата, осовременување на возниот парк и зголемен квалитет на услугите. Тогаш и незадоволството кај граѓаните ќе биде многу помало.
