Зголемена појавата на труење на кучиња во делчевско. Како што потврди ветеринарниот лекар, д-р Николчо Стојменовски кој со оваа појава често се среќава во неговата работа, појавата особено е забалежлива во последните неколку недели. Во најголем дел од случаите, како што додава, се работи за труење на домашни миленици, иако е забележливо и труење на кучиња скитници.
-Во последниот случај, во два обиди досега, успеавме да го спасиме домашниот миленик. За жал третиот обид беше кобен, не можевме ништо да направиме. Ваквите случаи и интервенциите кои ги правиме се чести и во најголем дел од случаите, животните завршуваат трагично, вели Стојменовски.
За семејството Мингарови, кои се сопственици на едно од отруените кучиња, загубата е голема, бидејки нивниот миленик иако бил кастриран и чипиран, досега немал нападнато никого.
-Кучето не беше скитник, ја чувавме врзана Шила и еднаш дневно ја шетавме. Досега ни се отруени пет кучиња. Живееме на село и сме од турска националност, не знаеме дали тоа е причината што ни се прави ова, но навистина е жално ова што се случува. Додека загари шетаат слободно низ селото, нашата Шила повеќе ја нема, велат Мингарови. Ветеринарите се децидни дека ваквите постапки никому не му одат од полза и апелираа на воздржаност од неодговорни постапки, кои се казниви со закон.
