Драматично и тензично. Два збора кои најдобро ја опишуваат ситуацијата на турско-грчката граница, откако Анкара го отвори патот на илјадници мигранти кон Европската Унија.
“Наскоро ќе бидат милиони”, ќе рече турскиот претседател Ердоган, обвинувајќи ја ЕУ дека не го почитувала договорот од 2016 година, според кој, Унијата требала да и плати шест милијарди евра на Турција за сместување на четири милиони сириски бегалци.
„Потрошивме 40 милијарди евра. Ветените шест милијарди евра Брисел не ги реализира. Сега велат дека ќе алоцираат една милијарда евра. Кого лажат? Не ги сакаме повеќе тие пари. Ќе најдеме пари“
Во обид за менаџирање на вонредната состојба, европскиот врв денеска е во Грција. Понудија финансиска и логистичка поддршка за земјата, велејќи дека Грција во моментов е штитот на Европа.
Посетата доаѓа ден откако 4-годишно дете од Сирија се удави крај грчкиот остров Лезбос, прва жртва на новонастанатата мигрантска криза. Хаосот не стивнува, што го потврдуваат и снимките на кои се гледа како грчката крајбрежна стража предупредувачки пука кон чамец полн со мигранти.
Според таен извештај на Агенцијата за заштита на надворешните граници на ЕУ – Фронтекс, Унијата ќе ја преплават мигранти.
