Претставнците на двете најголеми христијански цркви во Германија, католичката и протестантската, изразија изненадување од мерките на сојузната влада, кои предвидуваат велигденски верски церемонии, без присуство на верници, и најавија дека нема да ги следат препораките на владата.
„За време на Божик покажавме дека со претпазливост можеме да одржиме миса во присуство на верници. Затоа не сакаме да се откажеме од велигденската миса“, рече Георг Батицинг, претседател на германската бискупска конференција.
Протестантската црква во Германија досега одбиваше да ја коментира препораката на сојузната влада и најави консултации со претставници од политиката.
Претседателот на германскиот протестантски совет, Хајнрих Бедфорд-Стром, изрази зачуденост од одлуката.
„Одлуката нѐ изненади многу, особено имајќи предвид дека тоа е најважниот христијански празник“, рече тој.
Најави дека протестантската црква најпрвин ќе се обиде да открие од претставниците на политиката зошто предложените концепти за хигиена не се доволни и дека потоа ќе се одлучи како да се справат со барањето да не се одржи миса.
