Литија по улиците во центарот на Скопје ќе биде одржана денеска во пресрет на утрешниот празник на Раѓањето на Мајката Божја, Пресвета Богородица – заштитничката на градот Скопје.
Литијата ќе тргне од храмот Рождество на Пресвета Богородица во Скопје, по вечерната богослужба што ќе започне во 17:00 часот.
Утре, на денот на празникот, ќе биде отслужена утрена богослужба со почеток во 7:30 часот, а потоа и света литургија во 9 часот.
Братството при храмот Рождество на Пресвета Богородица во Скопје, со благослов на архиепископот охридски и македонски г.г. Стефан, ги повикува верниците и сите луѓе со добра волја да учествуваат во торжественото прославување на празникот на Раѓањето на Мајката Божја, Пресвета Богородица – заштитничката на градот Скопје.
