Претседателот на Русија, Владимир Путин, повика на итни преговори со НАТО и САД за руските безбедносни гаранции во услови на тензии околу Украина.
Владимир Путин ја истакна потребата од итно почнување преговори со САД и НАТО со цел да се утврдат правните гаранции за безбедноста на нашата земја и да се спречи идното проширување на Алијансата на исток и распоредувањето на вооружените системи во Украина и соседните земји што би биле закана за Русија – се наведува во соопштението на Кремљ објавено по телефонскиот разговор на Владимир Путин со финскиот претседател Саули Ниист.
Финска е долгогодишен посредник меѓу Русија и западните ривали.
На последната онлајн средба, одржана минатата недела, рускиот претседател побара од американскиот колега Џо Бајден правни гаранции за да се исклучи какво било ново проширување на НАТО, бидејќи Москва смета дека Западот го прекршил своето ветување со отворањето на вратите на Алијансата за земјите од Источна Европа и поранешниот СССР, по распадот на Советскиот Сојуз.
Во таа смисла, евентуалното членство на Украина во НАТО, Русија ќе го смета за преминување на црвена линија.
Западот во моментов се сомнева дека Русија подготвува инвазија на Украина и натрупува свои сили на заедничката граница.
Кремљ ги негира обвинувањата и тврди дека, , напротив, НАТО и се заканува на Русија со вооружувањето на Украина и распоредување на се поголем број воздушни и поморски сили во областа на Црното Море.
Путин, исто така, ги обвини украинските власти дека го прекршуваат договорот од Минск, кој содржи насоки за воспоставување мир во источна Украина (Донбас), каде што Киев речиси осум години војува со проруските бунтовници, за кои се верува дека добиваат поддршка од Кремљ.
