Прекрасното зајдисонце, езерото, планините, Канео, беа пресудни за младите Џони и Луси, Англичани кои живеат и работат во Лондон, се одлучат својата долгогодишна љубов ја крунисаат со венчавка на брегот на Охридското езеро.
Несекојдневна венчавка се одржа на брегот на Охридското езеро. Британската двојка Луси и Џони се заколнаа на вечна љубов во македонскиот туристички бисер, а специјално за оваа пригода во Охрид допатувале 160 нивни блиски роднини и пријатели од различни делови на Англија, но и од Австралија, Дубаи, Сингапур и од Германија, пишува порталот Охрид њуз.
Идејата доаѓа сосема случајно, на патувањето на Луси во Охрид, непосредно по веридбата со Џони. Штом пристигнува во Охрид, Луси знае дека тоа е местото на кое сака да ги покани своите пријатели и роднини за прослава на најубавиот момент во нејзиниот живот. Единствено, треба да се „убеди“ Џони дека тоа е вистинската локација.
– Некој кажа треба да го посетите Охрид, многу е убаво и јас реков добро. Кога стигнавме со пријателката се воодушевивме и помисливме – како тоа никој не слушнал за ова место? Толку е убаво, луѓето се гостопримливи, има многу нешта кои можат да се направат. И затоа што доаѓањето беше по веридбата помислив овде може да се организира навистина прекрасна венчавка. Па така му се јавив на Џони и реков: најдов прекрасно место, а тој одговори: Не се шегувај! Му велам: те молам види го Охрид и ако кажеш не, добро, нема да го спомнам повторно, раскажува Луси.
Венчавката се одржала минатиот викенд во дворот на црквата Свети Јован-Канео. Следувала забава на плажата Канео, а бендот кој ги забавувал гостите специјално за оваа прилика ја подготвил темата You are my sunshine на Џони Кеш, но овој пат со стихови напишани од брачниот пар.
Погледнете дел од атмосферата:
фото: Two clicks – Bitola
