Сите амандмани за Законот за јазици, во трето читање, се преведени, архивирани, обработени и ставени на е-Парламент, соопшти денеска Кабинетот на претседателот на Собранието.
Службата на Собранието, стои во соопштението, уредно постапуваше и постапува во рамките на своите надлежности и задолженија, се до целосното завршување на процесот.
– Со оглед на големиот број амандмани, истите потребно е да се разгледаат и да се постапи по нив согласно одредбите на Деловникот за работа на Собранието на Република Македонија, по што Законот за јазици ќе биде разгледан, се наведува во соопштението од Кабинетот на претседателот на Собранието.
Законот за употреба на јазиците, со кој се унапредува употребата на албанскиот јазик е во трето читање и за него опозициската ВМРО-ДПМНЕ поднесе 35.576 амандмани. Законот беше донесен на 11 јануари, а претседателот Ѓорге Иванов една недела подоцна стави вето на законот и до Собранието достави низа укажувања.
