Британскиот медиумски сервис Би-би-си изврши промени во репортажата за македонското малцинство во Грција, по незадоволството на грчката страна, пренесува грчки „Катимерини“.
Би-би-си додаде пасус во написот со кој се објаснува грчката позиција. Во дополнувањето се наведува оти грчката влада официјално признава само едно малцинство – муслиманите во Тракија, односно дека историски ги сметаше македонските Словени во грчкиот регион Македонија за јазична, а не за национална група.
Згора, нагласено е дека националноста на жителите на Македонија е македонска/државјани на Република на Северна Македонија, според Преспанскиот договор, и оти со тоа не се прави презумпција за постоењето на македонско малцинство.
Во репортажата на Би-би-си се посочува дека со ратификување на договорот со новоименуваната Република Македонија, Грција имплицитно го призна постоењето на македонскиот јазик и етничкото малцинство.
– Употребата на името „Македонија“ од страна на соседната држава имплицитно покажува дека Македонците се самостоен народ и ја отвора вратата за тешките прашања околу историјата за македонското малцинство во Грција – објави Би-би-си.
