Архитектот Николај Овчаров од Бугарија во тамошниот весник „Труд“ се пресмета со „браќата“ отаде границата, навредливо нарекувајќи ги „Северни Македонци“ и исмевајќи им го националниот идентитет.
„Кои сте вие драги Северни Македонци? Денешните чувари на словенското потекло и на ‘идентитетот’ на вашиот народ или оние кои пред само неколку години тврдеа дека потекнуваат директно од родот на Александар Велики? Оние чиј тогашен премиер Никола Груевски во јули 2008 година ги пречека на црвениот тепих на тогашниот аеродром ‘Александар Велики’ (веќе го изгуби славното име!) пакистанскиот принц Газанфар Али Кан и неговата сопруга принцезата Рана Атика?“, вели Овчаров.
„Си припомнувам на овој настан што се случи не толку одамна, не за да се зајадувам, туку за да покажам колку е променлив ‘македонскиот идентитет’ со текот на времето. И на крајот на краиштата јас не можам да изберам што е попретставително – да си ‘Бугарин-Татар’ или да потекнуваш од Пакистан“, додава архитектот во написот насловен „Истакнат Северен Македонец навестува распад на бугарската држава“, мислејќи на претседателот на Светскиот македонски конгрес, Тодор Петров.
