Драматична е ситуацијата вечерва во Охрид и Струга, откако циклонот Алексеј кој донесе силни ветришта кои достигнуваат брзина до 80 км/час но и силен дожд, предизвикаа бранови по неколку метри кои го поплавија крајбрежјето на Охридското езеро
Како што информираат локалните медиуми, брановите го поплавиле целото крајбрежје во Струга, а поплавен е и Охридскиот плоштад како и угостителските објекти во близина на кејот на езерото.
Под вода се делови од кејот и улицата „Коста Абраш“ пред Капетанијата на пристаништата, кои ги заплискуваат бранови од преполентото езеро, што е вообичаено при вака висок водостој. Водата повторно навлегува во угостителските објекти на првата брегова линија во центарот на градот и населбата Канео. Во одредени објекти има нови штети – пишува Охридњуз.
Според локалните медиуми, под вода е и патот Охрид – Пештани, а непрооден е и стариот пат од Охрид кон Струга во близина на Охридскиот аеродром.
Стариот патен правец Охрид-Струга, во близина на аеродромот е пополнет со вода и ѓубре кои го исфрлаат големите бранови од езерото – пишува Охрид1.
Информации за поплави во угостителски објекти лоцирани на самиот брег на езерото вечерва доаѓаат и од Струга. Центарот за управување со кризи – ЦУК, предупредува на влошување на сотојбата бидејќи во текот на ноќта се очекува невремето да го зголеми интензитетот, а се најавуваат и обилни врнежи од дожд во утринските часови.
Како што дознава OhridNews, исклучително загрижувачка е состојбата со колекторскиот систем кој е пред колапс. Поради зголеменото ниво на подземни води колекторот не може да ги преработува отпадните води и практично тој не функционира. За ова МЈП Проаква со допис го известила ЕЛЕМ, во кој предупредува на можноста да се случи вистинска еколошка катастрофа, бидејќи висок е водостојот на Дрим кај пречистителната станица Враништа и може да дојде до излевање на непречистени води во реката. Поради тоа Проаква бара да се намали испустот на вода од Охридското Езеро во Црн Дрим на 20-30 литри во секунда.