Врвни шефови за слатки од земјава во сабота (15 декември) во Веро центар во Скопје ќе ја направат најголемата чоколадна торта во Македонија која потоа ќе им ја поделат на присутните посетители. Приготвувањето на најголемата празнична торта долга четири метри ќе се одвива во рамките на Првиот чоколаден фестивал што го организира „Веро“ во соработка со „Гастромак“ во сабота во Веро центар со почеток од 11 часот.
Покрај тортата, посетителите ќе уживаат и во рачно изработено чоколадно село во кое секој елемент може да се јаде, голем Дедо Мраз направен од чоколадо, чоколадно семејство во зимски услови, пралини, чоколадни тартуфи и многу други слатки производи со новогодишни и божиќни мотиви, креации кои ќе бидат само мал дел од изложбената понуда на фестивалот.
