Урнат ѕид на семејна куќа, искршено ветробранско стакло на автомобил, навреди и закани дека ќе бидат убиени. Две стари и тешко болни лица со ужаснување ја раскажуваат мачната приказна за тортурата која со години, секојдневно ја преживуваат во својот роден Гостивар и тоа директно од општинската власт, која, како што тврдат, напросто сака да ги избрка од доминантно албанското соседство. Неодамна, на иницијативна од нивните соседи, а по наредба на градоначалникот Таравари, насилно и незаконски им бил урнат ѕид во внатрешноста на дворното место, а со објаснување дека токму таму, во нивниот двор мора да поминува улица.
Најголемиот апсурд, вели Радичевски, е во тоа што ѕидот бил урнат во истиот момент додека Таравари му ветувал дека никој не смее ниту да помисли да интервенира врз неговиот приватен имот.
Во одбрана на својот дом и достоинство Радически и неговата сопруга, биле нападнати од бројна толпа луѓе, а полицијата, како и повеќепати претходно, освен што прави записник не презема ништо за да ги заштити овие луѓе од вандалското однесување на нивните соседи.
Градоначалникот Таравари не одговора на нашите телефонски повици а неговиот портпарол е на одмор. Од канцеларијата за економски развој на Гостивар пак ни одговорија дека ѕидот на Радичевски бил бесправно изграден на земјиште на Општината и дека по неколку месечни молби тој самиот да го отстрани, бил урнат од градежна фирма која се занимава со таква дејност. Ги негираат неговите наводи дека бил мета на напад и на закани на национална основа и велат дека напротив, постојат докази дека токму тој ги навредува своите соседи.
И покрај се Радически не се откажува. Бара да му се надокнади направената штета и вели дека ќе ја продолжи борбата за опстанок на родното огниште по секоја цена.
